طارق حامد رجل المنتخب

طارق حامد اللي استبعدوه من المنتخب بحجة ان سنه كبر و المنتخب محتاج النزول بمعدل الأعمار و بناء جيل جديد و الكلام الحمضان ده لحد ما لعبوا عليه حمدي فتحي وجمبه السولية و نص ملعبنا كان مستباح ومفيش واحد بقوة طارق في افتكاك الكورة

النهاردة طارق حامد صاحب ال35 سنة محترف في اقوى و اسرع رتم لدوري عربي أساسي في فريقه و أساسي منتخب و كل اللي انتقده قبل كده بيشيد بيه .. بعد ما اتقال عليه مؤذي وهو إجمالي بطاقاته قبل الاستبعاد في 59 ماتش 5 انذارات يعني اقل من حراس مرمى رغم مشاركته في كاس عالم وامم افريقيا و تصفيات البطولتين و احتكاكات أقوى من اللي شارك فيها اي حد لعب مكانه

رجع اساسي تاني بعد خسرنا امم افريقيا و موصلناش كاس عالم و خسرنا في قبل نهائي البطولة العربية بجول سجله السولية في نفسه

مفيش حاجة اتغيرت طارق اللي حاربوه طول مسيرته في الزمالك و بيمدحوه دلوقتي هو نفس طارق اللي كان في الزمالك من كام شهر بس بمجرد ما مشي العقد النفسية خلصت و بقى طارق حلو وجميل و عليه سُكر .. مهما اتقال هيفضل واحد من افضل من مروا على الزمالك في تاريخه