المطريه حكاية حي شاهد علي التاريخ

المطريه حكاية حي شاهد علي التاريخ

العصر الفرعوني : أول عاصمة دينية في مصر القديمة في اون، و فيها ظهرت عبادة الشمس، و حط كهنتها واحدة من أهم نظريات الخلق عند المصري القديم و فيها تم إنشاء جامعة أون و اللي درس فيها أفلاطون وفيثاغورس و مع دخول الاسكندر الأكبر مصر اتسمت هليوبليس .

العصر الروماني : و تحديدا في القرن الأول الميلادي هربت السيدة العذراء مريم و السيد المسيح من بطش الملك الروماني هيرود لمصر و كان من أهم الأماكن اللي وقفت فيها العائلة المقدسة كانت المطريه و قعدت السيدة العذراء و السيد المسيح تحت شجرة جميز .

العصر الإسلامي : الحقيقة إن المطريه شهدت علي احداث مهمة في العصر الإسلامي .

في العهد الفاطمي : و تحديدا سنة ٩٧٢ م حاول القرامطة غزو مصر و لكن القائد جوهر الصقلي تمكن من هزيمتهم في المطريه .

في العهد المملوكي : كانت المطريه شاهدة علي تنصيب سلطان مصر .
سنة ١٢٦١م بعد موقعة عين جالوت المشهورة جه واحد لمصر اسمه الإمام احمد ابن الخليفة الظاهر بأمر الله العباسي فلما سمع الظاهر بيبرس ده ركب من القلعة و جه المطريه و قابل الخليفة العباسي الجديد في المطريه و راحو لباب النصر .

وفي ٤شعبان من نفس السنة أمر الظاهر بيبرس بعمل خيمة كبيرة في المطريه علشان يتم تنصيبه فيها و بالفعل حضر كبار الأمراء و رجال الدولة و تم قراءة أمر الخليفة العباسي الجديد بتولية الظاهر بيبرس السلطنة في مصر و الشام .

و في العصر العثماني : تحديدا سنة ١٥١٧م حصلت موقعة الريدانية علي ارض المطريه و فيها انهزم المماليك و انتصرت الدولة العثمانية ، بعد الموقعة ما خلصت السلطان سليم الأول جه المطريه و صلي العصر فيها و مشي .

في العصر الحديث : مكانتش المطريه بعيدة عن أحداث ثورة القاهرة التانية اللي قامت سنة ١٨٠٠ م ضد الحملة الفرنسية و اللي كان مركزها حي بولاق و جه الثوار لحي المطريه علشان يستخدمو المدافع التلاتة اللي الجيش العثماني سايبهم في المطريه .

جامع المطراوي كان شاهد على الصلح بين الأمام الأكبر محمد عبده والخديو عباس حلمي بعد سلسلة من المشاكل اختار النفي الأختياري للأمام محمد عبدة للمطرية والذي مازال يحمل أسم شارع الأمام محمد عبده فجه الخديو عباس حلمي بناء علي نصيحة رئيس الديوان علشان يصالح الشيخ محمد عبده في خطبة الجمعة بجامع المطراوي كبداية للصلح و دعا الخديو الإمام محمد عبده للغدا في سراي القبة .

من أشهر سكان حي المطريه

• أحمد بك شوقي أمير الشعراء و اللي قال عنها لما كان منفي في اسبانيا
  “وَهَفا بالفؤادِ في سَــلْسَبِيــلِ ظَمَــأٌ للسَّـــوادِ من عَيْنِ شَمْسِ
  شَهِدَ الله لَمْ يَغِبْ عَنْ جفـــوني شَخْصُهُ ساعــــةً ولَمْ يَخْلُ حِسي”
  و كانت المطريه و عين شمس منطقة واحدة في الوقت ده و من الشخصيات البارزة اللي جت لأحمد شوقي في بيته في المطريه الزعيم سعد باشا زغلول .

*الأمير يوسف كمال أحد امراء أسرة محمد علي باشا و اللي كان اغني شخص في مصر و كان تالت رئيس لجامعة القاهرة مؤسس كلية الفنون الجميلة .

*الفنان محمد عبدالوهاب و اللي كان مقيم مع أحمد بك شوقي في بيته في المطريه لإنه كان متبنيه .

• جعفر باشا والي أحد وزراء الأوقاف في مصر
  و الرئيس التاريخي للنادي الأهلي.

المطريه في السينما مكانتش المطريه بعيدة عن السينما و اتصور فيها افلام كتيرة من اشهرها فيلم رد قلبي و اللي اتصور في قصر الأمير يوسف كمال و فيلم طريق الشيطان و مسلسل صديق العمر .

المصادر في اول تعليق

#حكاواتيالتاريخ
#يوسفالسادات
#الحكاية
#حي_المطريه