علم اولادك اداب الزيارة
![](https://www.moltakaaliqtisad.online/wp-content/uploads/2022/03/inbound7144701094293620411.jpg)
علم إبنك.. إنه لو معزوم عند حد مايروحش فاضي، ومايخدش معاه شخص متعزمش، ويروح في ميعادة لا بدري ولا متاخر، ويلبس كويس وريحته تكون حلوة عشان يوصل للي قدامه انه بيحترمه ومقدره، ومايدخلش البيت بالجزمة أو الكوتشي حتي ولو صاحب البيت طلب ده، وإنه يخبط وياخد جنب “يمينه او شماله” المهم مايقفش في وش الباب عشان مايجرحش اهل البيت، وياكل الموجود من غير ما يطلب أصناف مش محطوطة حتي ولو مخلل، وياكل من غير صوت للمضغ، ويقفل بقه وهو بيمضغ، ومايختارش المكان اللي يقعد فيه، ولكن يقعد مطرح ماصاحب البيت يقعده لأن كل واحد أدري بخصوصياته، وياكل براحته عادي من غير كسوف، ولو مش عاجبه حاجة في الاكل مايقولش وياكل من اللي عاجبه بس، وماينساش يشكر اللي عزمه ويدعيله بزيادة الخير، ويوصل السلام للام أو الزوجة اللي ظبخت وإنه قد ايه أكلها جميل، ومايقومش يغسل غير لو صاحب البيت أذنله، واما يغسل يتأكد إنه نضف الحوض وراه وماسبش أي بواقي أكل، ويفرد الفوطة بعد ما ينشف بيها، ويمشي موطي ومايبصش علي تفاصيل الشقة اللي دخلها، ولو معزوم مع حد وقام يغسل زيه مايقعدش مكان اللي قام لأن ده حق غيره، ولو هيصلوا في البيت إبنك مايصليش إمام إلا لو صاحب البيت طلب منه ده، ولو دخل ولقي ناس بتتكلم في موضوع من الادب إنه مايغيرش فجأه الموضوع اللي بيتكلموا فيه، ولا يقطع كلام حد ويتكلم هو لأن ده بيقلل احترامه، وإنه يستأذن قبل مايمشي، ولو صاحب البيت صمم يقعده يقعد ويجبر بخاطره، ولو هيخرج يعلي صوته وهو خارج عشان اهل البيت يستعدوا لخروجه، ويدعي لصاحب البيت وهو خارج بالبركة والسعة، ولو قابل الأم أو الزوجة ضروري يشكرها علي مجهودها ويمدح أكلها وكرمها.
والعزومة الجاية أكيد هتبقي علي ابنك بقي، وان شاء الله هقولك يستقبل ضيوفه ازاي.
#آداب_الزيارة.